Líffræðifélag Íslands
Líffræðiráðstefnan 2015
Erindi/veggspjald / Talk/poster E50
Sæmundur Bjarni Kristínarson (1), Sara Björk Stefánsdóttir (1), Sigríður Jónsdóttir (1), Vilhjálmur Svansson (1), Jón Már Björnsson (2), Arna Rúnarsdóttir (2) og Sigurbjörg Þorsteinsdóttir (1)
1. Tilraunastöð Háskóla Íslands í meinafræði að Keldum, 2. ORF Líftækni
Kynnir / Presenter: Sæmundur Bjarni Kristínarson
Tengiliður / Corresponding author: Sæmundur Bjarni Kristínarson (sbk13@hi.is)
Sumarexem er húðofnæmi í hestum orsakað af biti smámýs (Culicoides spp) sem lifir ekki á Íslandi. Tíðni sjúkdómsins er mjög há í útfluttum hrossum. Ofnæmisvakarnir hafa verið einangraðir og tjáðir og ferill sjúkdómsins skilgreindur. Fyrir þróun ónæmismeðferðar og mat á árangri hennar er mikilvægt að geta framleitt ofnæmisvakana í fleiri en einu tjáningarkerfi og á sem hagkvæmastan hátt. Markmið verkefnisins er að kanna hvort hægt sé að nota endurraðaða ofnæmisvaka framleidda í byggi til þess að prófa IgG svörun hesta sem bólusettir hafa verið með samsvarandi vökum framleiddum í E. coli. Tólf hestar voru bólusettir í eitla með Cul n 3 og Cul n 4 ofnæmisvökum hreinsuðum úr E. coli og sermissýni tekin eftir þrjár bólusetningar. Heildar IgG og IgG undirflokkasvörun var prófuð í elísaprófi á endurröðuðum Cul n 3 og Cul n 4 hreinsuðum úr E. coli, skordýrafrumum og byggi. Hestarnir sýndu kröftuga IgG svörun aðallega IgG1, IgG4/7 og IgG3/5 á bæði Cul n 3 og Cul n 4 úr öllum þremur tjáningarkerfum. Svarið var sterkast á E. coli framleiddu próteinunum enda bólusett með þeim. Svörun á byggframleiddu ofnæmisvakana var svipuð eða hærri en á þá sem framleiddir voru í skordýrafrumum. Nota má endurraðaða ofnæmisvaka framleidda í byggi til prófunar á mótefnasvari hesta sem bólusettir hafa verið með samsvarandi vökum framleiddum í E. coli. Verið er að prófa sömu ofnæmisvaka til að örva eitilfrumur og meta boðefnasvörun hjá bólusettu hestunum og IgE svörun hjá sumarexemshestum.