Líffræðifélag Íslands
Líffræðiráðstefnan 2015
Erindi/veggspjald / Talk/poster E4
Guðjón Már Sigurðsson (1,2), M. John Tremblay (3), Rémy Rochette (1)
1. University of New Brunswick, 2. Hafrannsóknastofnun, 3. Bedford Institute of Oceanography, Department of Fisheries and Oceans
Kynnir / Presenter: Guðjón Már Sigurðsson
Tengiliður / Corresponding author: Guðjón Már Sigurðsson (gudjon@hafro.is)
Hjá hinum ýmsu humartegundum hefur komið í ljós að botntaka lirfustigsins er einn mikilvægasti tíminn í lífsferlinum og hefur lirfufjöldinn verið notaður sem nýliðunarvísitala við stofnmat á humri t.d. í Ástralíu og á Nýja-Sjálandi. Þá eru rannsóknir hafnar á humri í Karabíska hafinu og undan austurströnd Bandaríkjanna með svipuð markmið í huga. Í kjölfar funda með humarsjómönnum á austurströnd Kanada kom í ljós mikill áhugi á að hefja nýliðunarrannsóknir á þeim slóðum. Í framhaldinu var sett á laggirnar rannsóknaverkefni með það að markmiði að finna botntökusvæði og á hvaða hátt hentugast væri að safna gögnum um nýliðun humars. Einnig var rannsakað hvaða líffræðilegu ferlar og umhverfisþættir hefðu áhrif á hvar botntakan ætti sér stað. Sýnum var safnað með sérstökum humargildrum á tveimur stórum svæðum við Fundyflóa að sumarlagi á árunum 2010 – 2013. Líkönum var beitt til að kanna hvaða áhrif hinir ýmsu þættir hefðu á útbreiðslu. Niðurstöður sýndu að NAO fyrirbrigðið (North Atlantic Oscillation Index) hafði mest áhrif en einnig fjöldi unghumra, dýpi og yfirborðshiti. Þá virtust vera til staðar aðrar sveiflur sem ekki var hægt að útskýra.