Fjölda blóðflögueininga er fargað árlega sökum stutts geymslutíma. Ef örverur eru til staðar skapar fjölgun þeirra áhættu fyrir blóðþega  séu einingarnar geymdar lengur en 5 daga. Svo stuttur tími veldur því að fjöldi eininga rennur út og þarf að farga. Við deild rannsókna og nýsköpunar í Blóðbankanum hefur á undandförnum árum verið þróaðar aðferðir til að nýta útrunnar blóðflögueiningar til ræktunar á miðlags-stofnfrumum með góðum árangri. Miðlagsstofnfrumur búa yfir áhugaverðum eiginleikum sem nýta má í læknisfræði og því þarf að vera hægt að rækta þær á öruggan hátt. Nýting útrunnina blóðflaga við frumuræktun getur komið í stað kálfasermis og stuðlað að auknu öryggi auk þess sem dýrmæt afurð er nýtt en ekki  fargað. Nýlega var kerfi til örveruóvirkjunar með amotosalen og UV ljósi innleitt í  framleiðsluferli  Blóðbankans. Við sýnum framá að hægt er að nota útrunnar örveruóvirkjaðar blóðflögur sem og hefðbundnar blóðflögueiningar við rækt á miðlags-stofnfrumum og miðlagslíkum fósturstofnfrumur.Miðlags-stofnfrumur og miðlagslíkar fósturstofnfrumur voru ræktaðar í frumuræktunaræti sem innihélt roflausn úr útrunnum  blóðflögum. Engin neikvæð áhrif á sérhæfingu, svipgerð, fjölgun né ónæmismótun komu fram.Hægt er að nýta útrunnar blóðflögueiningar Blóðbankans til að útbúa roflausn sem styður við vöxt miðlags-stofnfruma í rækt. Slíkt er fjárhagslega hagkvæmt, dregur úr notkun dýraafurða og eykur öryggi við ræktun miðlags-stofnfruma fyrir klínísk not.