Líffræðifélag Íslands
Líffræðiráðstefnan 2013
Erindi 54



Áhrif Aurora-A kjarnatjáningar á brjóstakrabbameinssérhæfða lifun



Margrét Aradóttir (1), Jón G. Jónasson (2), Sigríður Þ. Reynisdóttir (1), Ólafur A. Stefánsson (1), Laufey Tryggvadóttir (3), Jórunn Erla Eyfjörð (1) og Sigríður Klara Böðvarsdóttir (1)

1) Rannsóknarstofa í Krabbameinsfræðum, Háskóli Íslands
2) Rannsóknarstofa Háskóla Íslands í vefjameinafræði
3) Krabbameinsfélag Íslands

Kynnir/Tengiliður: Sigríður Klara Böðvarsdóttir (skb@hi.is)

Aurora-A kínasi gegnir mikilvægu hlutverki í stjórnun frumuhringsins. Yfirtjáning á kínasanum tengist mögnun geislaskauta í mítósu sem veldur truflunum í aðskilnaði systurlitninga sem getur leitt til mislitnunar og krabbameinsmyndunar. Yfirtjáning á Aurora-A er m.a. algeng í brjóstakrabbameinum. Í þessari rannsókn var Aurora-A kjarnatjáning metin með mótefnalitun á vefjaörflögum í alls 391 brjóstaæxli, þar af voru 107 með BRCA2 999del5 kímlínubreytingu og 284 af óþekktum uppruna. Aurora-A kjarnalitun fannst marktækt oftar í æxlum frá BRCA2 arfberum. Verri brjóstakrabbameinssérhæfð 10 ára lifun var marktækt tengd Aurora-A yfirtjáningu hjá báðum brjóstakrabbameinshópum. Áhrif Aurora-A tjáningar á brjóstakrabbameinssérhæfða lifun var skoðuð í tengslum við litnun, estrogen viðtaka (ER), Ki-67 tjáningu og luminal undirhópa. Meðal arfbera var einnig skoðuð lifun í tengslum við Aurora-A tjáningu og tap á BRCA2 villigerðarsamsætu. Á meðal einstaklinga með brjóstakrabbamein af óþekktum uppruna hafði Aurora-A tjáning marktæk neikvæð áhrif á slæma brjóstakrabbameinsérhæfða lifun hjá einstaklingum með luminal B krabbamein, fjöllitnun og ER neikvæða tjáningu. Á meðal BRCA2 999del5 arfbera voru marktæk neikvæð áhrif Aurora-A kjarnalitunar á slæma brjóstakrabbameinsháða lifun hjá þeim sem höfðu tvílitna æxli og ER jákvæða tjáningu. Þau tilvik á meðal BRCA2 arfberanna þar sem bæði var um að ræða tap á BRCA2 villigerðarsamsætunni og yfirtjáning á Aurora-A tengdust marktækt mjög slæmum horfum.